تحية بوغطاطية للجميع،
ما كاينش لي ماغاديش يتافق معايا بلي من أروع الأحاسيس لي يقدر الواحد يعيشها، هي فاش شي حد كيكذب عليك ونتا عارفو بلي كيكذب ولكن مخليه يكذب… لا والزوينة هي يكون هو متيق بلي راه قدر يكذب عليك وبلي نتا ماعايقش زعما بالكذوب ديالو.
ومن أروع الأحاسيس عاوتاني هي فاش شي حد كيبغي يبان عليك مجهد بزاااف وبلي غادي يفاجئك بشي حاجة مادايرش ليها لحساب، ونتا أصلا ماشي غير عارف شنو غادي يدير وشنو غادي يقول، وإنما عارف حتى فشنو كيفكر قبل ما يفكر فيه…والأروع هي فاش كتحرق ليه الفيلم قبل ما يبدا يصنع فيه…. واخا صراحة أنا من النوع لي كيعجبني نتفرج فالفيلم بلا ما يحرق ليا شي حد الأحداث ديالو ويعاود لي على التفاصيل ديالو.
ولكن فاش كيكون الأمر متعلق بواحد بحال زكرياء مومني، البطل العالمي فالزفيط والسلوكيات، كيولي من الواجب على كل محب للحق وللحقيقة، أنه يفرش ليه الزفيط ديالو قبل ما يزفطو… خصوصا مع واحد المسنطح كبير بحال زكيكو.
البارح زكرياء مومني خرج فواحد الفيديو مكشكش مغلغل، كيغوت لربي لي خلقو: عوك عوك المخزن تابعني حاضيني كيمارس عليا ومانعرف شنو…. وفاللخر ديال الفيديو قالك أسيدي غادي يفركع واحد الخبر غادي يزعزع القصر الملكي فالرباط كيتعلق فشي شخصية جد جد مقربة من الملك وبلي النظام المغربي غادي يبات بلا نعاس…. امممم عنتر بنو شداد هادا.
طبعا لي ما عرفش شكون هو مومني وما عارفش السياق… بمجرد ما غادي يسمع هاد الهضرة غادي يسحاب ليه بلي زكيكو غادي يجيب شي سر من أسرار النووي. والحال أن الأمر يتعلق بواحد الخبر تنشر هادي سيمانة فموقع Africa Intelligence وعااااد زكيكو ساق ليه الخبار.
وحسب معلومات مؤكدة، ماشي زكيكو هو لي ساق لخبار لداك الخبر، وإنما سيدو علي المرابط هو لي قالها ليه ودفعو باش يخرج ديك الخرجة ديال البارح.
والدليل أن زكيكو ما عمرو كان مأبوني (abonné) لموقع Africa Intelligence، ويالاه عاد تأبونا ليها.
علي المرابط هو لي حرض مومني باش يقلب البارابول جيهت البوليس الكندي لي بدا يهاجمهم ويتاهمهم بلي خدامين مع المخزن، وهاد النظرية ديال كولشي خدام مع المخزن وكولشي كيتواطؤ مع المخزن، شخص واحد من أشباه المعارضين لي معروف بها، هو علي المرابط… والدليل لي كيأكد هادشي، هي أنه مباشرة من مور الفيديو ديال زكيكو، ناض المرابط خرج بتدوينة كيدير التسويق البَعدي للخوبير ديال زكيكو، أو ما يسمى بـ service après vente… مهم ماعلينا.
الخبر لي فرحان به زكيكو كيقول بلي السكرتير الخاص لجلالة الملك، منير الماجيدي، كان رفع واحد الدعوى قضائية ضد موقع “تويتر”، “X” حاليا، باش يحيدو واحد الفقرة كاينة فالتعريف ديال مومني فالحساب ديالو (Biographie)، كيقول فيها بلي الماجيدي هدد مومني بالقتل، الشيء لي عتابرو السكرتير الخاص للملك أنه تشهير في حقه وماكاينش منو، خصوصا وأنه كان ربح 3 ديال الدعاوى ضد مومني في فرنسا بين 2016 و2017 بنفس التهمة… تهمة التشهير ولي كانت بسبب نفس الادعاءات الكاذبة: “التهديد بالقتل”.
إلا أن القضاء هاد المرة ما حكمش لصالح منير الماجيدي. وهادا هو الخبر لي فرحان بيه زكيكو قالك غادي يزعزع أركان النظام وغادي يخلي القصر بلا نعاس هههههه، إلا أن الخبر الحقيقي ماشي هو هادا. وإنما الخبر الحقيقي لي هضر عليه موقع “Africa Intelligence” فالمقال لي تنشر نهار 8 نونبر 2023، ولي أنا متأكد بلي ماغاديش يهضر عليه مومني، فيه جوج ديال المعطيات.
المعطى الأول أن القضاء ما حكمش لصالح السيد منير الماجيدي، مااااشي حيت ما قتنعش بلي داكشي لي مكتوب فالحساب ديال مومني راه تشهير… لا ! وإنما القضاء ما حكمش لصالح الماجيدي حيت رفض المطلب لي تقدم به الدفاع ديالو لي هو منع مومني من كتابة نفس العبارة لمدة طويلة.
والسبب لي خلا الماجيدي يتقدم بهاد الطلب بهاد الشكل لي يقدر يعتبرو البعض أنه متشدد، هي أن المومني واخا سبق دانو القضاء الفرنسي بتهمة التشهير فحق السكرتير الخاص للملك، ولكن مع ذلك كيعاود يرتكب نفس المخالفة.
والمعطى الثاني، هو أن موقع “Africa Intelligence” أكد واحد الحقيقة من الحقائق لي كتفقص مومني وما كيبغييييش نهائيا يهضر عليها، هي أن السيد منير الماجيدي صفعو 3 ديال المرات عن طريق القضاء الفرنسي لي دانو بتهمة التشهير…. والسبب هو نفس الهضرة لي كيدعي من خلالها مومني السكرتير الخاص للملك بلي هددو بالقتل وهادشي لي ثبت القضاء أنه ماكاينش منو…. لا فالتصريحات ديال مومني بشكل فردي، ولا فالادعاءات لي كان نشرها فالكتاب ديالو ولا فالتصريحات لي كان كيدليها مع مراتو فالسابق.
وهادا تحدي مني لزكيكو، إذا كان باقي مازال كيعتقد بلي فيه شي حس ديال الرجلة، (واخا كولشي عرفو قزحي)، ولكن هادي فرصة ومناسبة باش يثبت العكس…. التحدي هو يخرج يقرا الخبر ديال Africa Intelligence كامل مكمول وحرفيا، بلا زيادة بلا نقصان. إذا سميتو “راجل” يديرها…. ولكن ما يقداااارش !!! ماشي غير حيت ماشي راجل، وإنما حيت الخبر الكامل، فيه 3 ديال الصفعات من أقوى الصفعات لي خداهم فحياتو من طرف القضاء الفرنسي… زعما زكيكو يقدر يتصالح مع ذاتو ويخرج يقول بلي القضاء الفرنسي صرفقو 3 ديال المرات ؟؟ موحااااالش ههههه
